Solemnisht u përurua Hamami i rikonstruar në Dibër

Nefail SPAHIU
Dibër, 25 korrik 2007 - Hamami i qytetit të Dibrës, i cili deri në fillimin e viteve të nëntëdhjeta shërbente si Banjë për larje, prej të martës, ky objekt do të jetë një Galeri moderne në mesin e qytetit, që do t’u japë mundësi artistëve të ndryshëm, poetëve, rinisë e subjekteve tjerë për t’i zhvilluar aktivitetet e tyre.
Në kuadër të manifestimit “Ditët e kulturës- Dibra 2007″, në prani të një grupi intelektualësh dhe qytetarë të Dibrës, u bë hapja solemne e këtij objekti të rinovuar, me ndihmën e Ambasadës holandeze, nëpërmjet Bankës Botërore dhe pushtetit vendor të Dibrës, ndërsa i priu ekspozita e piktorit të njohur dibran Sabit Bocku.
Duke folur për rëndësinë e objektit në fjalë, para aktit të prerjes së shiritit të përurimit, kryetari i Dibrës, Argëtim Fida, mes tjerash, pasi foli për fazat e rinovimit të hamamit, shprehu falënderimin e tij ndaj Ambasadës holandeze, e cila nëpërmjet Bankës Botërore dha donacion për sjelljen në gjendjen e tashme të këtij Hamami, njëherësh. Duke folur për vlerat artistike të piktorit Sabit Bocku, respektivisht për ekspozitën e hapur enkas për këtë rast, profesori Petrit Damani theksoi se ky piktor pas shumë ekspozitash të pavarura dhe kolektive na jep mundësi që të jemi të pranishëm në një paraqitje të 24 tablove dydimensionale dhe pesë punimeve tredimensionale.
“Vetë sigla e ekspozitës ‘Oxhaqet’ është një cikël në tërësi e që ngërthen në një të kaluar të largët e vjen deri në ditë tona, pra ka një lidhshmëri të pandarë nga jeta e përditshme”, tha Damami. Sipas tij kjo ekspozitë, është një gërshetim elementesh krijuese që të lë përshtypjen dhe në një moment të shtyn të zbërthesh nga ajo që ke vërejtur.
“Pra nëpërmjet elementeve figurative siç janë vija, forma, ngjyra, lëvizjet, e kështu me radhë, vizitori aty mund të gjejë vetveten me sa ai e kupton, duke formuar një imazh nga ajo që ka vërejtur” vëren profesori. Ekspozita po vizitohet nga artdashës të shumtë nga Dibra, Peshkopia dhe mërgimtarët tanë. Ajo do të jetë e hapur deri më 2 gusht.

DUEL NOSTALGJIK MES  OMONIMËVE  NGA DIBRA DHE NGA AMERIKA

KORABI, Dibër – KORABI, Nju Jork 3:3 (1:3)

Nefail SPAHIU
Dibër, 23 korrik 2007 – Në kuadër të manifestimit tradicional “Ditët e kulturës – Dibra 2007″, në pjesën sportive të këtij evenimenti, si rrjedhojë e bashkëpinimit të ngushtë ndërvëllazëror, mbërëmë në terrenet e sporteve të vogla në Dibër, para një auditori të respektuar, sportdashës Dibranë dhe shumë nga diaspora, u zhvillua një ndeshje sa emocionale aq edhe nostalgjike me dy skuadrave me të njejtin emër Korabit të Dibrës së Madhe dhe atij të Nju Jorkut,që kryesisht përbëhet nga Dibrano-Amrerikanët në SHBA.
Në terren vrapuan vëllezërit e një gjaku dhe një soji, disa prej tyre këtë e bënin për të dytën herë, ndërkaq kishte prej tyre që pas kaq vitesh “debutonin” para publikutr të vendlindjes, kush me ca kilogramë më shumë e kush më mëngët, por që ndër publikun e pranishëm me potezat dhe lëvizjen e lehta në terren ngjallën emocione dhe ovacione të shumta. Në këtë rast rezultati ishte më pak i rëndësishëm, pasi triumfoi morali sportiv, ndenja për ti ruajtur lidhjet e gjakut dhe traditës sportive, zaten këte e pohoi edhe kryetari Dibrës, Argëtim Fida, dhe kryetari i skuadrës nga Amerika, Murat Mela, duke shtuar se këto ndeshje janë një farkues i mirë i atdhedashurisë dhe lidhjeve të ngushta me trojet stërgjyshore. Pas një loje atraktive , ku rezultati herë ishte në favor të njerës anë e herë të anës tjetër, që më në fund të përfundoi baraz, me fitues etikën futbollistike.

KORABI (Dibër): Mulladauti, Ushtelenca, G.Çilku, L.Çilku, Krifca, Bajrami, Shemsiu

KORABI (SHBA): Sh.Ramku, A.Jani, A.Paumi, K.Kaziu, P.Papraniku, A.Gorenca, M.Mela, A.Kllobuçishta.

Ndeshjen e referuan gjyqtarët nga Dibra, Luftiu dhe Fisheku.
Golat i shënuan: Kaziu 2 dhe Jani për Korabin nga Amerika dhe Bajrami 2 dhe G.Çilku për Korabin e Dibrës.

Për sportistët e dy Korabëve, sot në Kabinetin e kryetarit të komunës së Dibrës, Argëtim Fida, nën patronazhin e së cilit realizohet ky manifetsim u realizua një pritje në cilën kryetarët e dy skuadrave Murat Mela dhe Sejfula Jani këmbyen mendime për bashkëpunim të gjithanshëm mes skuadrave omonime. Dibrano-Amerikëve, pritje u organizoi edhe Myftiu i Dibrës, Ruzhdi Lata, ndërkaq, nga nikoqirët u janë siguruar edhe vizita “Knauf-Radikës” dhe HEC “Spile” si dhe vizitë varreve të Jasharajve në Drenicë të Kosovës etj.

Gjashtë orë koncert në sheshin “Skënderbe”

Mbrëmjen e 10 korrikut 2007 në Dibër filloi manifestimi “Ditët e kulturës-Dibra 2007” me një koncert madhështor e maratonik që zgjati 6 orë, duke filluar nga ora 20 e duke përfunduar në ora 2 të mëngjesit të datës 11 korrik. Argëtim Fida, kryetar i Komunës së Dibrës nën patronatin e të cilit mbahet ky manifestim kulturor që do të zgjatën nga 10 korriku e deri më 11 shtator, në fjalën e tij përshëndëtëse në sheshin Skënderbe të mbushur përplot me shikues, deklaroi se: “është kënaqësi kur së bashku konstatojmë se në Dibër, megjithatë ka rini. Që sonte dhe gjatë tërë verës së bashku me vëllezërit tanë që kanë ardhur nga diaspora, do t`i kalojmë së bashku ditë të kënaqësisë dhe haresë, ditë të vlerave tona kulturore”. Në vazhdim para një numri marramendës prej disa mijëra shikuesish, me këngët e tyre popullore, zbavitëse dhe të trendeve më të reja muzikore, u paraqitën këngëtarët Agron Maqellara, Shkëlqim Agolli, habibe Ostreni, Shpëtim Duraku, Evzi Kaja, Halil Kërkuti, Xheni Mece, Daja Do, Monil dhe Roland Cutra, nga Dibra, Kastro Zizo, Dinas, Lili, Suzi, nga Tirana, Ledy M nga Berati, Besa nga Saranda, Jasmini nga Peshkopia, Adriana dhe Adelina Tahiri nga Shkupi dhe Albin Jajaga nga Kosova. Ky koncert transmetohej drejtpërdrejt nga TV lokal “Alfa”, dhe nëpërmjet internetit për mërgimtarët tanë me angazhimin e Afrim dhe Gazmend Kërkutit. Pas këti koncerti të shkëlqyer këngëtarët dhe miqtë e tyre dibranë, vazhduan këngën e vallen deri në ora 7 të mëngjesit në terracën e godinës për sportet në ujë, që ndodhet buzë liqenit të Dibrës. Në ditët që vijnë të këtij manifestimi “Ditët e Kulturës-Dibra 2007”, më 21 korrik SHKA “Haki Stërmilli” në Qendrën kulturore-Dibër, do të shfaq koncertin folklorik me këngë e valle popullore, më 23-30 korrik në Galerinë e arteve në Hamamin e Qytetit-Dibër, piktori Sabit Bocku do ta hapë ekspozitën me punimet në pikturë, më 28 korrik në Qendrën kulturore-Dibër, SHKA nga f. Zepishtë, do të paraqitet me koncert me këngë e valle popullore, më 24-31 korrik, në poligonin sportiv dhe në stadiumin e qytetit, do të mbahet turneu në futboll të vogël dhe në futboll të madh, më 1 gusht do të mbahet turneu në karate, në ambientet e SHF”Vëllazërim Bashkim”, më 5-10 gusht në poligonin sportiv të qytetit do të mbahet turneu në basketboll, më 12 gusht në Qendrën e sporteve në ujë në Liqenin e Dibrës, do të mbahet Regata ndërkombëtare, ndërsa në mbrëmje në sheshin Skënderbe, do të mbahet festa tradicionale e bostanit, më 17-18 gusht në Qendrën për kulturë, do të mbahet portiku poetik “Dr. Lutfi Turkeshi”, më 19 gusht në sheshin Skënderbe, do të interpretohet mjuzikli “Dasma Rome” dhe nga 4-11 shtator në Qendrën për kulturë do të mbahet Festivali tradicional “Teatri shqiptar në Maqedoni-Dibra 2007.